Создаден е на местото од каде што градот Охрид најубаво се доживува – местото каде што извираат сите најубави разгледници. Одовде спомените се градат, а воздишките сами се раѓаат. Сместен на самиот брег на езерото, а во пазувите на планината Галичица, хотелот „Парк Лејксајд“ во едно ги спојува убавината на градот, мирот на паркот и свежината на планинскиот воздух. Од дневната глетка поубав е само ноќниот одсјај на градските светла врз езерската површина.

Со срцето на Охрид сме поврзани преку прекрасна променада. Чекорејќи или возејќи велосипед, до градската марина ќе стигнете за многу кратко време (3 км). По патот, на располагање ви стојат бројни барови, катчиња за рекреација и фитнес, скејт–парк и детски игралишта.